ՀՀ երկրորդ նախագահ Ռոբերտ Քոչարյանի նկատմամբ կիրառված կալանքի վերացման ՀՀ վերաքննիչ քրեական դատարանի որոշումն ապօրինի է: Այս մասին հայտարարել է Հատուկ քննչական ծառայությունը: 

ArmeniaOn, օգոստոսի 13: «ՀՀ վերաքննիչ քրեական դատարանի որոշումը ապօրինի է, և Վերաքննիչ քրեական դատարանը դուրս է եկել իր լիազորությունների շրջանակից: Հույս ունենք, որ դատախազությունը վճռաբեկ բողոք կներկայացնի»,- վերաքննիչ քրեական դատարանի որոշման վերաբերյալ Tert.am-ին իրենց դիրքորոշումն են հայտնել Հատուկ քննչական ծառայությունից:

Հիշեցնենք, որ այսօր Վերաքննիչ քրեական դատարանը բավարարեց պաշտպանների բողոքը՝ վերացնելով առաջին ատյանի դատարանի որոշումը Քոչարյանին կալանավորելու վերաբերյալ՝ հաշվի առնելով, որ Ռոբերտ Քոչարյանն անձեռնմխելի է: Այսինքն՝ Ռոբերտ Քոչարյանի նկատմամբ խափանման միջոց չի ընտրվել, նա «Մարտի 1-ի» գործով մեղադրյալ է:

«Մարտի 1-ի» գործով վարույթն իրականացնող մարմինը՝ ՀՔԾ-ն, նրան մեղադրանք է առաջադրել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։ Քոչարյանը կալանավորվել էր հուլիսի 27-ին:

ՀՀ սահմանադրության 140-րդ հոդվածը սահմանում է, որ Հանրապետության նախագահն անձեռնմխելի է:

«Հանրապետության նախագահն իր լիազորությունների ժամկետում և դրանից հետո չի կարող հետապնդվել և պատասխանատվության ենթարկվել իր կարգավիճակից բխող գործողությունների համար»,– ասվում է Սահմանադրության 140-րդ հոդվածում։

tert.am