Սահմանադրական կարգի տապալման և «Մարտի 1»-ի 10 զոհերի գործերը միացվել են:  Այս մասին Կառավարության նիստից հետո լրագրողների հետ զրույցում ասել է Հատուկ քննչական ծառայության պետ Սասուն Խաչատրյանը:  

ArmeniaON, օգոստոսի 30: Դուք պատկերացնո՞ւմ եք՝ նախաքննության գաղտնիությունը հանվի, ասել է Հատուկ քննչական ծառայության պետ Սասուն Խաչատրյանը՝ խոսելով «Մարտի 1-ի» գործով մեղադրյալ, ՀՀ երկրորդ նախագահ Ռոբերտ Քոչարյանի նախաքննության գաղտնիքը հանելու, հանրությանն ամբողջական տեղեկատվություն տալու հայտարարության մասին:

«Նման ընթացակարգ գոյություն չունի: Պատկերացնո՞ւմ եք՝ ինչ կլինի, եթե նախաքննության գաղտնիքը ամբողջ ծավալով բացահայտվի: Դուք պատկերացնո՞ւմ եք՝ ինչ կլինի, եթե այս ամբողջը գաղտնազերծվի: Հանրության պահանջը պետք է օրինական լինի, չի կարող լինել անօրինական պահանջ, թեկուզ այն հանրությանն է, ու մենք այն դիտարկենք որպես հիմնավոր: Գաղտնիությունը վերաբերում է նախաքննության փուլին: Գործը քննվում է դռնբաց, եթե չի պարունակում պետական գաղտնիք»,- նշեց Սասուն Խաչատրյանը:

ՀՔԾ պետի խոսքով՝ նախաքննության գաղտնիությունը գործի շահերից է: Ըստ նրա՝ նման պահանջներ բավարարելը իրատեսական չէ:

Ինչ վերաբերում է հայտնի 0038 հրամանին, ապա Խաչատրյանն ասել է.

«0038 հրամանը հրապարակային ենք դարձրել այն չափով, որ չափով որ այդ հրամանը մեզ տրամադրող ՊՆ-ը հարմար է գտել գաղտնազերծել: Որ հատվածը որ գաղտնազերծվել է, հրապարակվել է»:

Դիտարկմանը, թե Ռոբերտ Քոչարյանն ըստ էության ասում է, որ ինքն իր սահմանադրական կարգը չէր տապալի, Սասուն Խաչատրյանն ասաց, որ Քոչարյանն իրեն նույնացնում է պետության, սահմանադրական կարգի հետ, դա ճիշտ չէ:

Իսկ հարցին՝ ներգործո՞ւմ է Քոչարյանը նախաքննության վրա՝ լինելով ազատության մեջ, ՀՔԾ պետը պատասխանեց. «Չեմ մեկնաբանում»:

Ինչ վերաբերում է Քոչարյանի այն տեսակետին, որ գործը «Մարտի 1-ի» 10 զոհերի բացահայտման հետ կապ չունի, Սասուն Խաչատրյանն ասաց, որ թողնում է հանրության գնահատմանը:

«Գործերը (Սահմանադրական կարգի տապալման ու 10 զոհերի–խմբ.) միացվել են, վարույթը մեկն է: Ես չեմ լսել Քոչարյանի ելույթը, որտեղ ասում է, թե չեն բացահայտվում սպանությունները, ես չգիտեմ, թե նրան որտեղից նման տեղեկություն: Ամեն ինչ արվում է, արվելու է, ես լիահույս եմ, որ գործը, այդ թվում՝ սպանություններ կատարած անձանց մասով բացահայտվելու է»:

Իսկ այն հարցին, թե արդյոք «Մարտի 1»-ի գործով կա՞ն նոր փաստաթղթեր, նա պատասխանեց. «Այո, նոր փաստաթղթեր կան, բայց դրանք չեմ կարող հրապարակայնացնել»

tert.am